Гэрээсээ ажиллах орчин яагаад оффисын адил чухал болсон бэ?

Сүүлийн жилүүдэд гэрээсээ болон хосолсон (Hybrid) хэлбэрээр ажиллах нь олон байгууллагын хэвийн ажлын нэг хэсэг болсон. Үүнтэй зэрэгцэн гэрийн ажлын орчин нь зөвхөн ширээ, сандал байрлуулсан булан биш, харин бүтээмж, эрүүл мэнд, ажлын сэтгэл ханамжид шууд нөлөөлөх чухал хүчин зүйл болжээ.

Steelcase-ийн судалгаагаар нийт ажилтнуудын 75% нь гэртээ зориулалтын ажлын орчинтой болсон бөгөөд зөв зохион байгуулалттай ажлын орчин нь төвлөрөл, бүтээмж, тав тухыг мэдэгдэхүйц сайжруулдаг байна.

1. Эргономик сандал хамгийн чухал хөрөнгө оруулалт

Олон хүн гал тогооны сандал, буйдан эсвэл энгийн сандал дээр олон цагаар ажилладаг. Гэвч ийм орчин нь:

• Нуруу, хүзүүний өвдөлт
• Мөрний ачаалал
• Түргэн ядрах
• Анхаарал төвлөрөл буурах

зэрэг асуудлыг үүсгэдэг.

Харин нурууны тулгууртай, өндрөө тохируулдаг, суудлын зөв хэлбэртэй эргономик оффис сандал нь удаан хугацаанд тав тухтай ажиллах нөхцөлийг бүрдүүлдэг.

2. Зөв өндөртэй ажлын ширээ бүтээмжийг нэмэгдүүлдэг

Ширээний өндөр тохиромжгүй бол мөр, бугуй, нуруунд илүү их ачаалал үүсдэг.

Идеал ажлын ширээ нь:

• Дэлгэцийг нүдний түвшинд байрлуулах боломжтой
• Гар 90° өнцгөөр байрлах
• Хөлөө чөлөөтэй байрлуулах хангалттай зайтай байх

шаардлагатай.

Хэрэв боломжтой бол өндөр нам тохируулдаг ширээ ашигласнаар өдөрт сууж болон зогсож ажиллах боломжтой болдог.

3. Ажлын болон амьдралын орчноо ялгах хэрэгтэй

Гэрээсээ ажиллах үед ажлын болон амралтын орчин холилдох нь стрессийг нэмэгдүүлдэг.

Иймээс:

• Тусгай ажлын булан гаргах
• Ажлын дараа компьютероо унтрааж орчноо цэгцлэх
• Боломжтой бол хаалгатай эсвэл тусгаарлагдсан хэсэг ашиглах

нь ажлын болон хувийн амьдралын тэнцвэрийг хадгалахад тусалдаг.

4. Байгалийн гэрэл болон ногоон ургамал нэмээрэй

Судалгаагаар байгалийн гэрэлтэй ажлын орчин нь:

• Сэтгэл санааг сайжруулах
• Ядаргаа багасгах
• Анхаарал төвлөрлийг нэмэгдүүлэх

эерэг нөлөөтэй байдаг.

Мөн жижиг ногоон ургамал, дулаан өнгийн гэрэлтүүлэг нь ажлын орчныг илүү тав тухтай болгодог.

5. Хямдхан харагдах биш, удаан ашиглагдах тавилга сонго

Онлайнаар үзэмжтэй харагдсан ч удаан ашиглахад тав тухгүй, бат бөх биш тавилга сонгох нь түгээмэл алдаа байдаг.

Ажлын ширээ, сандал нь өдөр бүр олон цагийн хэрэглээг даах чанартай байх нь урт хугацаанд илүү зөв хөрөнгө оруулалт болдог.